MONGKOEK, BOKOTI, BAU

 

MONGKOEK, BOKOTI, BAU

 

Jonjong  nai  Mongkoek (burung Hantu), Bokoti (Tikus) ka’ i Bau (Babi)

 I totongak nu kuhat ko saanguk na biling, I biling aijok ko binatang anu jojong i kijo. I patuu nu biling koi  Bau salak je nonganak sanggo nu anaknyo i Sasong Bokio.ka’i Daude Jeheng .

 I uno nu biling Koi Bokoti, i tuuk nu biling koi Mongkoek

 

Sampihi – pihi i Mongkoek olamo sa koek – koek, mbakmo tohoyot na Sasong Bokio ka’i Daude Jeheng. Kadodopannyo I lagamo I Bau nai Bokoti.

Bau      : Bokoti posabat mae pe na oko tinak  uno nu biling ka tulungi mae pen a aku

Bokoti : Saidik kada ? apa na anu ku poko ala o tulungi

Bau      : Lako pokapotakon pe na amanatku bei mongkoek, poto’i  kokolokmo pe sa koek – koek mbakmo tohoyot nai Sasong Bokoio ka’i Daude Jeheng

Bokoti : oo iik mo aku mamba je

 

Nambamo nai Bokoti bei Mongkoek I tuuk nu kauk

Litik….. litik …. Litik  ….

 

Mongkoek       : Toka bela’

Bokoti             : Toka susa’ mbak toka susa’, aku ola mompokapotakon pe amanat i Bau konyo kokolokmo pe sa koek-koek mbakmo tohoyot nai Sasong Bokio ka’i  Daude Jeheng

Mongkoek       :  Lako pinsusulek ka’ toka poto’i bei Bau, aku mbak mongkoe-koekakon monduhuk balabat nu mian, aku mbak mongkoe-koekakon monsumemek kasubi nu mian

 

Nintataukmo nai Bokoti mamba bei Bau

Litik … litik  … litik

 

Bau                  :  Mosia koi Mongkoek

Bokoti             : Koi Mongkoek poto’i bei Bau aku mbak mongkoe-koekakon monduhuk balabat nu mian, aku mbak mongkoe-koekakon monsumemek pomulaon  nu mian

Konu kinyonyowa i Bau, kijo I Mongkoek nongkanti-kantismo aku kana pakalajaanku namonduhuk balabat nu mian ka’ monsumemek pomulaon nu mian

 

Pinihimo asik, I mongkoek olamo sa koe-koek yo apa nai Sasong Bokio ka’ I Daude jeheng mbak tohoyot ola sak mobulaki I Bau

Kadodopannyo  sinaimo mulek I Bau nai Bokoti mamba bei Mongkoek

 

Bau                  : Bokoti lako mulek mamba bei Mongkoek, poto i kokolokmo oko sa koe-koek  mbakmo tohoyot nai Sasong Bokio ka’i Daude Jeheng

 

Litik …. Litik  … litik  nai Bokoti  mamba bei Mongkoek

 

Mongkoek       : Kadamo mulek na oko Bokoti ?

Bokoti             : Aku Sinai mulek I Bau konyo potoi bei Mongkoek  kokolokmo pe sa koek-koek mbakmo tohoyot nai Sasong Bokio ka’i  Daude Jeheng

Mongkoek       : Kabai komiu mbak mangalatik ka’ pinolawaningku utumae ?

Mongkoek gaganakmo motambuhak

Bokoti             : Boli montambuhak i aku, aku ola mompokapotakon amanat I Bau

Mongkoek       : Bokoti lako’mo pinsusulek poto’i bei Bau aku mbak mongkoe-koekakon monsisigi ubak nu ikan nu mian.

Bokoti             : Boli Sumo atinak na oko Mongkoek, atinak oko mongkanti-kantismo aku

Mongkoek       : Aku mbak mongkanti-kantis I he-he mo

Ninsusulekmo nai Bokoti non tangi-ngilakonmo tando

Litik…. Litik …. Litik.. nghm…..  nghm ….nghm

 

Tinakomo I patuu nu Biling na I Bokoti

Bau                  :  Yooo kada na oko Bokoti ka’ non tangi-ngilakonmo tando

Bokoti             :  I Mongkoek nong kanti-kantismo aku

Bau                  : Apa na konyo ?

Bokoti             : Konyo aku mbak mongkoe-koekakon monsisigi ubak nu ikan nu mian.

Bau                  : Kalu sumo tinak imbokmo da kita molio kajongan I Biing sanggaat

Nambamo nai Bau i ngubaknyomo nai Sasong Bokio ka’I Daude Jeheng, I Bokoti bai nambamo pinala’ianmo nu aha nai Mongkoek

 

Pinupusmo

 

Pesan Moral dalam cerita ini : jangan suka menyampaikan pesan karena akibatnya bisa melukai perasaan kita seperti tokoh si Tikus (Bokoti) yang suka menyampaikan pesan akhirnya mendapat kata-kata yang menyakitkan dari Mongkoek (Burung Hantu)

SINONG KA' BOKOTI

 PINIMPU'UAN NU SINONG NONGKAN BOKOTI

Jonjong nai Sinong, Ajahan, Johak, Kesik, Bonsing ka' i Bokoti

I totongak u Padang ko Sinong monganak, anaknyo aijok   ola  sa'a - sa'anguknyo. Mbak piamanga papa-papadeka' mae nai Ajahan pake-pake na sapato jengki, ka' sok i landaknyo na anak nu Sinong, yoo natemo. 

Notambuhakmo nai Sinong bei Ajahan :

Sinong     :  kada .. kada . na oko Ajahan ka' nompakemo Sapato Jengki da oko nimpapadeka  da sok i Landakum na anakku da iya nate.

Ajahan    : mokonyo aku nin sapatomo Jengki... tinowangku nai Johak nompakemo baju siting

Nambamo nai Sinong non sumpaga i Johak :

Sinong    : kada ... kada.. na oko Johak ka' nompakemo Baju Siting da i Ajahan nompake Sapato Jengki da iya nimpapadeka da sok i landaknyo na anakku da iya nate.

Johak    : mokonyo aku nompakemo baju siting tinowangku nai Keesik nontakosmo Pulu Janga

Nambamo nai Sinong bei Keesik 

Sinong    : kada ... kada.. na oko Keesik ka' nontakosmo Pulu Janga da i Johak  nompakemo Baju Siting da i Ajahan nompake Sapato Jengki da iya nimpapadeka da sok i landaknyo na anakku da iya nate.

Keesik    : mokonyo aku nontakosmo Pulu janga  tinowangku nai Bonsing  non sulelemo hambut

Nambamo mulek nai Sinong bei Bonsing

Sinong    : kada ... kada.. na oko Bonsing ka' non sulelemo hambut da i Keesik nontakosmo Pulu Janga da i Johak  nompakemo Baju Siting da i Ajahan nompake Sapato Jengki da iya nimpapadeka da sok i landaknyo na anakku da iya nate.

Bonsing    : mokonyo aku non sulelemo hambut   tinowangku nai  Bokoti  nompopalatmo duhukan

Nambamo nai Sinong bei Bokoti

Sinong    : kada ... kada.. na oko Bokoti ka' nompopalatmo duhukan da i Bonsing  non sulelemo hambut,  da i Keesik nontakosmo Pulu Janga,  da i Johak  nompakemo Baju Siting,  da i Ajahan nompake Sapato Jengki,  da iya nimpapadeka da sok i landaknyo na anakku da iya nate.

Maisa no lawani nai Bokoti.... "hap" sinau'umo i Sinong na Bokoti.

Lengkat i aijok sidutu'mo aiya Sinong le montowa Bokoti langsung nu sa'u.

Pinupusmo.

Pesan moral dalam cerita ini : setiap perbuatan baik ataupun buruk pasti ada akibatnya.Seperti tokoh si Tikus yang menjadi penyebab awal kematian anak Kucing akhirnya menjadi makanan Kucing