BALAN KA’ I HE’A 

Jonjong na i Balan ka’i He’a……….
 

I totongak nu kuhat i he’a milawe i patu nu kauk daka. I kauk daka aijok kae-kae na uwanik. Hau-haunyo i pilawean nosahakmo nai Balan. Tinowanyomo nai He’a luku-lukut. 

Balan        :     “ He’a.. apaa nau bau atinak “ 

He’a         :    “ eee aiya montomongi gong i Tomundo aita’ kae-kae i kauk” 

tinijukmo i He’a na uwanik. Aiya i Balan nompalesayamo i He’a. Saba’ ginagaukmo i He’a. 

Balan       : “ yooo kada ka’ o tamongi na gong i Tomundo”

He'a        :  “ Mbak ku sumbuk suwele ola koi Tomundo tamongiakon” 

Balan        :  “ Boli sumo atinak He’a sisiki mae na aku kabai kada na gong aijok” 

He'a    :  “Oko ku sisiki je bai boli o poto’ i benu sanga-sangalu ola oko ka’ aku na monsumbuk” 

Balan        :  “ gampangmo atinak asal dongan mae sisiki”

Konu kinyonyowa I He’a aiyamo na wakitu’nyo aku mombalosi oko Balan. Naipuan oko nongakali aku¸ saginku ola oko na nongkan aku ola bine’anum kilitnyo. Uka aiya akumo na mongakali oko.

He'a    :  “ Sumo aiya Balan gong aijok mokonyo nu posai i Tomundo o tamongi¸ kana gong aijok le o batong tumuuk mo na sagin sanga-sangalek kahu-kahu maha lolok” 

Salata nohongo sisik i He’a nai Balan ia tinolo onyopmo¸ konu kinyonyowa i Balan yoo megiak na sagin maha saanguk na alek¸ bosu mbak ala-alapan na ku ta’up sina uka.

Balan    :  “ Yo soba batong mae pe’e mau-maunyo mbak koi Tomundo”

He'a    : “ eee boli – boli moko kita silaka”

Balan    :  “ Mbak mule’ nu sumbuk i Tomundo donganmo mae batong¸ aku aiya mo’ohopmo hondo ola minsan me’e mombatong” 

Pakisa i Balan be i He'a.

He'a    : “ Oo kalu sumo atinak jagai oko na aiya gong da aku mamba bei Tomundo mompotoi”

Balan    :  “ Oo ik mo lako mamba poita sahanyo da mbak o tambuhak i Tomundo” 

Nambamo nai He’a pinala’iannyomo na Balan. Hala-halap i Balan totu’u nai He’a mamba bei Tomundo padahal i He’a nalaimo. 

Balan ma osamo na montanda’i madik ko buhit i Hea lubat. Kana malawemo ka’ mo’ohopmo nai Balan¸ konu kinyonyowa i Balan soba da posi ku batong na aiya gong da ku pahangkanakon na sagin maha. 

I Balan nongalamo kauk sangkolong ka’ nu babalong na aijok uwanik aupe konyo totu’u gong i Tomundo. Yoo apaa ka’ i lumahap nosimpuha na uwanik binosiknyomo na i Balan. 

Kana talalo manjok na uwanik nombosik payak i Balan natemo 

Pinupusmo 

Pesan Moral : Jangan berbuat jahat terhadap orang lain karena suatu saat kita mendapat balasannya seperti tokoh dalam cerita ini yaitu Balan yang pernah berbuat jahat pada He’a dan He’a pun di lain waktu membalasnya.